Angjelina Nika ka lindur në Tropojë, Shqipëri. Pasioni i saj për artin e koreografisë filloi qysh në moshën gjashtë vjeçare.
Angjelina Nika u largua nga Shqipëria në vitin 1997 dhe mori me vete një bagazh përvoje jetësore në vallëzimin dhe koreografinë popullore, tradicionale shqiptare. Ajo ia ka kushtuar jetën e saj mësimdhënies dhe jo vetëm përmes vallëzimit por përmes punës së saj të palodshme në komunitet; përqëndruar në ruajtjen e kulturës, historisë dhe ndjenjës atdhedashëse që ajo kultivoi dhe po përcjell tek brezat e rinjë.
Angjelina Nika është mishërimi i shërbimit shembullor në komunitet dhe çmohet për përkushtimin e saj ndaj komunitetit shqiptar në SHBA.
Mori pjesë në shumë festivale në Shqipëri, Evropë dhe Shtetet e Bashkuara, ku u nderua me shumë shpërblime, duke përfshirë edhe çmimin presidencial shqiptar, "Mjeshtër i Mash", nga presidenti Bujar Nishani.
Vlerësimet dhe dekoratat e shumta të zonjës Nika vijnë nga institucione të ndryshme shqiptare, si dhe ato amerikane. "Albanian Excellence" e njohu historinë e Angjelina Nikës si të veçantë dhe i hapi vend në faqet e librit ku përfshihen historitë më të suksesshme shqiptare. Ajo po ashtu mori çmimin, "Gruaja e vitit", nga Motrat Qiriazi. Mirënjohje të veçantë mori edhe për punën e bërë me "Rozafati", një ansambël i krijuar si pjesë e kishës katolike "Zoja e Shkodrës". Me përkushtim dhe dashuri të lartë profesionale, ajo u mëson qindra artistëve të rinj të diasporës valle të vjetra shqiptare nga treva të ndryshme shqiptare.
Vlerësime të tjera për Angjelinen janë edhe "Çmimi i Shërbimit" nga Ana e Malit e çmimi “Nënë Tereza" nga Mark Gjonaj. Ajo vlerësohet nga Asambleja e Shtetit të New York-ut për kontributin e saj në Kremtimin e Kanonizimit të Nënë Terezës. Njohja për shërbimin e saj ndaj komunitetit i është dhënë gjithashtu edhe nga Legjislatura e Shtetit të New York-ut dhe "Foleja Shqiptare".
Angjelina Nika vazhdon të jeton dhe punon në New York, gjithnjë në shërbim të komunitetit shqiptar duke përfaqësuar kulturën e lashtë Ilire në Shtetet e Bashkuara të Amerikës.